पुणे : ‘डॉ. अब्दुल कादर मुकादम यांचे ‘इस्लाम : ज्ञात आणि अज्ञात’ हे पुस्तक मराठी भाषेत इस्लामी तत्वज्ञानाची मांडणी करणारे महत्त्वपूर्ण पुस्तक आहे. संवेदनशील विषयावर त्यांनी केलेली मांडणी वस्तुनिष्ठ आणि विवेकवादी परंपरा पुढे नेणारी आहे. पुरोगामी संघटनांनी, इस्लामविषयी जाणून घेण्याची इच्छा असणाऱ्या प्रत्येकाने हे पुस्तक मुळातून वाचले पाहिजे,’ असे मत राष्ट्र सेवा दलाचे अध्यक्ष डॉ. गणेश देवी यांनी व्यक्त केले.
‘इस्लाम : ज्ञात आणि अज्ञात’ या डॉ. मुकादम लिखित पुस्तकाचे प्रकाशन डॉ. देवी, प्रमोद मुजुमदार, अन्वर राजन, कलिम अजीम यांच्या हस्ते झाले. त्या वेळी डॉ. देवी बोलत होते. डॉ. मुकादम यांचा या वेळी सत्कार करण्यात आला.
डॉ. देवी पुढे म्हणाले, ‘भाषा आणि तत्त्वज्ञानाची सांगड या पुस्तकात घालण्यात आलेली आहे .राष्ट्र सेवा दलात मुकादम यांची जडणघडण झाल्याने सेवा दलाचे संस्कार त्यांच्या लिखाणात दिसून येतात. मी या पुस्तकाचा कानडी अनुवाद करण्यासाठी प्रयत्न करेन आणि लवकरच ते कानडी वाचकांनाही उपलब्ध करून देण्यात येईल.’
डॉक्टर मुकादम म्हणाले, ‘मागील पंधरा वर्षांपासून इस्लाम फोबिया सुरू आहे. मी इस्लाम तत्त्वज्ञानाची मांडणी आणि अभ्यास ४० वर्षांपासून करत आहे. त्यासाठी मी पाश्चात्य संदर्भ वापरले आहेत. इस्लामबद्दल मराठीत वाचायला मिळणारे लेखन शंकास्पद आहे.’
ज्येष्ठ पत्रकार प्रमोद मुजुमदार यांनी डॉ. मुकादम यांची प्रकट मुलाखत घेतली. सर्फराज अहमद यांनी सूत्रसंचालन केले. ‘दी मुस्लिम अकादमी’, ‘दक्षिणायन’ आणि ‘सलोखा’ या संस्थांनी या कार्यक्रमाचे आयोजन केले होते.
